Psalms 135

Kũgooca Ngai nĩ ũndũ wa Ũnene Wake

1 ^aGoocai Jehova.

Goocai rĩĩtwa rĩa Jehova;
inyuĩ ndungata cia Jehova-rĩ, mũgoocei,
2inyuĩ mũtungataga thĩinĩ wa nyũmba ya Jehova,
o inyuĩ mũrũgamaga nja-inĩ cia nyũmba ya Ngai witũ.

3 ^bGoocai Jehova, nĩgũkorwo Jehova nĩ mwega;
inai mũgooce rĩĩtwa rĩake, nĩgũkorwo nĩ rĩega.
4 ^cNĩgũkorwo Jehova nĩethuurĩire Jakubu atuĩke wake,
agathuura Isiraeli atuĩke igai rĩake kĩũmbe.

5Niĩ nĩnjũũĩ atĩ Jehova nĩ mũnene,
atĩ Mwathani witũ nĩ mũnene gũkĩra ngai ciothe.
6 ^dJehova ekaga ũrĩa wothe ekwenda,
kũu igũrũ na gũkũ thĩ,
o na kũu iria-inĩ o na kũrĩa guothe kũriku mũno.
7 ^eNĩwe ũtũmaga matu mambate kuuma ituri-inĩ cia thĩ;
nĩwe ũtũmaga kũgĩe heni irehanĩte na mbura,
na akarehe rũhuho kuuma mĩthithũ-inĩ yake.

8 ^fNĩwe waringire marigithathi ma Misiri,
marigithathi ma andũ na ma nyamũ.
9 ^gWee Misiri, nĩwe watũmire thĩinĩ waku kũringwo ciama na morirũ,
agĩũkĩrĩra Firaũni na ndungata ciake ciothe.
10 ^hNĩwe waringire ndũrĩrĩ nyingĩ
na akĩũraga athamaki maarĩ hinya:
11 ⁱnĩo Sihoni mũthamaki wa Aamori,
na Ogu mũthamaki wa Bashani,
o na athamaki othe a Kaanani;
12akĩheana bũrũri wao ũtuĩke igai,
ũtuĩke igai kũrĩ andũ ake a Isiraeli.

13Rĩĩtwa rĩaku, Wee Jehova, rĩtũũraga nginya tene,
ngumo yaku, Wee Jehova, ĩgakinyĩra njiarwa na njiarwa.
14 ^jNĩgũkorwo Jehova nĩagaciirĩrĩra andũ ake,
na aiguĩre ndungata ciake tha.

15 ^kMĩhianano ya ndũrĩrĩ ĩthondeketwo na betha na thahabu,
o wĩra wa moko ma andũ.
16Nĩĩrĩ tũnua, no ndĩaragia,
nĩĩrĩ maitho, no ndĩonaga;
17 ^lnĩĩrĩ matũ, no ndĩiguaga,
o na ndĩrĩ mĩhũmũ tũnua-inĩ twayo.
18Andũ arĩa mamĩthondekaga makaahaana o tayo,
na noguo arĩa othe mamĩĩhokaga makaahaana.

19Inyuĩ nyũmba ya Isiraeli, goocai Jehova;
Inyuĩ nyũmba ya Harũni, goocai Jehova;
20Inyuĩ nyũmba ya Lawi, goocai Jehova;
inyuĩ arĩa mũmwĩtigĩrĩte, goocai Jehova.
21 ^mJehova arogoocwo kuuma Zayuni,
o we ũtũũraga kũu Jerusalemu.

Goocai Jehova.